Stawizny pěstowarnje

W Ralbicach maja hižo dołho pěstowarnju. Ze spočatka 60tych lět jako pěstowarnja w času žnjow zarjadowana, wutwori so 1970 stajna pěstowarnja w gmejnje. 1994 přewza CSB z.t. nošerstwo, doniž Serbske šulske towarstwo w lěće 2004 pěstowarnju a hort do swójskeho nošerstwa njepřewza.

Serbske přebywanišćo „Dr. Jurij Młynk“ leži srjedź wsy. Pěstowarnju wobdawa rjana zahroda z wulkim hrajkanišćom, kotrež skići dźěćom najlěpše wuměnjenja při pohibowanju na čerstwym powětře. Hort w šulskim twarjenju zmóžnja zdobom wužiwanje cyłodnjowskich poskitkow.

Wulka wažnosć kładźe so na nałožowanje serbskeje rěče. Zhromadnje pěstuja so serbske nałožki a tradicije w běhu lěta. Při najwšelakorišich přiležnosćach drasća so dźěći narodnu drastu a wuhotuja ze spěwami a rejemi małe programy. Jako serbska pěstowarnja witaja tež němskorěčne dźěći, kiž nimaja doma móžnosć, serbsce wotrosć. Samozrozumliwje so do serbskeho wobswěta přijimuja a tak kaž připódla druhu rěč nawuknu.

Křesćanske žiwjenje kaž tež swjećenje cyrkwinskich swjatych dnjow słušatej k wobstatkej pěstowarskeho lěta. W „Božich hodźinkach“, kotrež so tydźensce poskićeja, zeznajomjeja so dźěći z bibliskimi stawiznami. Nabožne kubłanje a křesćanske hódnoty su w přebywanišću do cyłkowneho pedagogiskeho kubłanja zapřijate a wotbłyšćuja so w prašenjach a nazhonjenjach dźěći.

Předšulska skupina ma wosebite spěchowanja: sport kaž tež joga za dźěći.

W pěstowarni dźiwa so na strowe zežiwjenje. Bliskosć domu k Łazkowskemu lěsej wužiwaja dźěći z kubłarkami k pućowanju.