Wupisanja dźěłowych městnow

 

WUPISANJE MĚSTNA JEDNAĆELA

Serbske šulske towarstwo z.t. wupisa městno 

jednaćela (m/ž/d).

SŠT jako kubłanske towarstwo je mjez druhim nošer serbskich a Witaj-pěstowarnjow, fachowy partner za wšitke kubłanske naležnosće Serbow w Sakskej a Braniborskej kaž tež čłon dźěłowych skupin a politiskich gremijow we woběmaj zwjazkowymaj krajomaj. Zdobom je nošer kubłanskeho srjedźišća LIPA w Smjerdźacej a projektoweje towaršnosće za medijowu pedagogiku a serbsku rěč LUCIJA.

nadawki a zamołwitosće:

• organizatoriske zwoprawdźowanje zaměrow towarstwa
• hospodarski a personalny nawod zarjada

naše wočakowanja:

• wysokošulske wotzamknjenje na polu hospodarskeho abo personalneho managementa abo přirunajomna kwalifikacija
• praktiske nazhonjenja w zarjadniskim, hospodarskim, zjawnostnym a projektowym dźěle
• wěstosć we wobchadźenju z wobdźěłanjom elektroniskich datow (EDV) a z nowymi medijemi
• zamóžnosć so přesadźić a jasnje komunikować
• wobknježenje serbšćiny ertnje a pisomnje

Poskićamy zajimawu a zamołwitu nawodnu funkciju z mnohimi móžnosćemi kreatiwneho skutkowanja. Płaćimy mzdu po TV-L. Dźěłowe městno je Budyšin.

Na zbrašenych a jim runostajenych požadarjow při samsnej kmanosći a kwalifikaciji prěnjorjadnje dźiwamy. Jich wosebje namołwjamy so přizjewić. Požadanskim podłožkam připołožće prošu wotpowědny dokład.

Dźěłowe městno chcemy ručež móžno wobsadźić. Zajimcy njech swoje nadrobne požadanje hač do 20.06.2025 zapodadźa. K tomu słuša dospołne předstajenje wosobinskeho a powołanskeho žiwjenja.

adresa towarstwa:
vorstand@sorbischer-schulverein.de
Serbske šulske towarstwo z.t. | předsydstwo
Póstowe naměsto 2 | 02625 Budyšin

 

PUĆOWANSKE TURY Z KUBŁANSKIM WOBSAHOM

Pytamy ručež móžno

zajimowanych a hibićiwych sobudźěłaćerjow
za zestajenje serbskich pućowanskich turow. (m/ž/d)

Narěčimy wšitkich, kotřiž so we Łužicy derje wuznaja 

• abo maja požadosć, swoju domiznu wědomje wotkryć
• ale tež wučerjow a studentow wučerstwa
• a kotřiž chcedźa šule podpěrać z materialijemi wo ekskursijach ze serbskim ćežišćom.

 

wjace wo tym zhoniće tu (wupisanje jako pdf)