Nošer pěstowarnjow

Serbske šulske towarstwo je připóznaty nošer swobodneje młodźinskeje pomocy. Jako tajki je nošer třoch serbskich pěstowarnjow (Ralbicy, Chrósćicy a Wotrow) kaž tež štyri Witaj-pěstowarnjow w Sakskej a Braniborskej (Němcy, Malešecy, Choćebuz-Žylow, Choćebuz) z wjace hač 600 žłobikowymi, pěstowarskimi a hortowymi dźěćimi.

SŠT je k spěchowanju a rewitalizaciji serbskeje rěče wuwił modelowy projekt Witaj po přikładźe bretonskeho DIWAN-modela.

Cil

Najwažniši cil modifikowaneho rewitalizaciskeho programa je wobknježenje resp. nawuknjenje hornjo- abo delnjoserbskeje rěče.

Přez nałožowanje dospołneje imersije hižo w zažnej starobje zanurja so dźěći po přeću zwjetša němskich staršich do serbskeje rěče.

Slědźenje wo mozach

Aktualne slědźenja wo wuwiću mozow dopokazuja, zo wobsedźa dźěći kmanosć wědomeho reflektowanja rěče. Wone zamóža samostatnje informacije zjimać, po tym zo su słowa a jich přirjadowanje spóznali. Samostatnje spóznaja tež zhromadnosće a rozdźěle mjez maćernej a druhej rěču.

Tak so w rozmołwach ze staršimi a kubłarkami dźěćom awtomatisce gramatika posrědkuje. Mozy čłowjeka spóznaja tež tute struktury we wulkej měrje samostatnje. Wědome nawuknjenje rěčnych prawidłow so bohužel často spěšnje zaso zabudźe.

Kubłarki nałožuja serbsku rěč, zo bychu wobsahi, začuća a poćahi zwuraznili. Dźěći napodobnjeja kubłarki, za to je rěč nimoměry wažny srědk dorozumjenja.

Zakładna šula

Wuske zhromadne dźěło wšěch potrjechenych zawěsći efektiwny přechod z pěstowarnje do zakładneje šule, kaž je to w kubłanskich a zdźěłowanskich planach Braniborskeje a Sakskeje předwidźane.

Nazhonjenja

Po wjace hač dźesaćlětnych nazhonjenjach zwěsćichmy, zo je niwow dwurěčnych resp. cuzorěčnych znajomnosćow pola dźěći, kiž po metodźe dospołneje imersije wuknu, signifikantnje wyši hač pola dźěći, kiž druhu rěč hakle w šuli wuknu.

Wažne je, zo njezwěsćichu so žanežkuli deficity w niwowje maćerneje resp. druheje rěče w zakładnej šuli.

Přechod wot pěstowarnje do šule

Přechod wot modeloweho projekta Witaj w pěstowarni k 2plus w šuli resp. k bilingualnej wučbje so systematisce přihotuje. Hač k zastupej do zakładneje šule zamóža dźěći wotpowědnje stawej swojeho rěčneho wuwića dwě rěči nałožować a maja tak wulki předskok porno jednorěčnym dźěćom.