Dźěło ze staršimi

Pohladajće na webstronu Serbskeho šulskeho towarstwa www.dyrdomdej.de.

Tam namakaće zaběry za cyłu swójbu.

Komunikacija a zhromadne dźěło ze staršimi je wažny wobstatk skutkowanja našeho towarstwa. Kubłanje a zdźěłowanje dźěći słuša k najwažnišim nadawkam kubłarkow. Wšě dźěći dyrbja so w našich pěstowarnjach derje čuć. W kóždej pěstowarni skutkuje wolena staršiska přirada. Starši maja móžnosć so indiwidualnje z wjednicu abo kubłarkami rozmołwjeć. Ćežišća při tym su:

zwučenje dźěći na pěstowarnju
dwurěčne (serbsko-němske) kubłanje
wuwiće a spěchowanje dźěći
próstwy a kritiki staršich
wuhotowanje swjedźenjow
sponsorstwo
pomoc při domjacych nadawkach
W dwurěčnych staršiskich listach dóstanu starši trěbne informacije a móža so přez nje dalekubłać. Štyri razy wob lěto so tute wudawaja. Kóždy list wěnuje so wosebitej temje. Listy wobsahuja powšitkowne kubłanske prašenja, pokiwy za staršich, rozprawy a nowosće z pěstowarnjow a hortow kaž tež zabawnu stronu za dźěći.

Swójbne kubłanje

Prošu wobkedźbujće aktualizowanja, dodaća a změny.

Dźěłarnička "klankodźiwadło"

Dnja 05.02.2020 wotmě so we Wotrowskej pěstowarni dźěłarnička "klankodźiwadło" za starši. Pod nawodom klankodźiwadźelnika zdobychu sej starši prěni rjemjeslniski grat. Na kóncu wječora běchu dobreje nadźije a rozsudźeni, nadźěłany kruch w pěstowarni předstajić.

Impresije ze swójbneho swjedźenja 25.08.2019

tema: wulět do srjedźowěka

Tema swjedźenja bě srjedźowěk. Starši ze swojimi dźěćimi móžachu na starym kamjenju nože wótřić, z kłokom a prokom třěleć abo z prawym ryćerjom so stać. Wosebje so spodobaše klankodźiwadło, lětanje rubježnych ptakow, pjelšćenje, bajkowy stan, jěchanje na ponyjach, praženje chlěba při wohenju, pastyr ze swojimaj psykomaj, kładźenje mandaly z přirodnych materialijow, stare hry, paslenje mječow, krónow a měškow a bifej.

Na kóncu swjedźenja bě jeno mała wotpadkowa tita trěbna, dokelž plastika drje njeby do srjedźowěka a tež nic hižo do dźensnišeho so hodźała.

Impresije ze swójbneho swjedźenja 10.06.2018 w Hórkach

“Hórki: SŠT na swójbny swjedźeń prosyło

Wčera zetka so na 13. swójbnym swjedźenju Serbskeho šulskeho towarstwa w Hórkach něhdźe 200 ludźi. Na sportnišću a we wulkim swjedźenskim stanje zabawjachu so dźěći serbskich pěstowarnjow ze swojimi staršimi, dźědami a wowkami na wšelakorych stacijach. Mjez druhim móžachu krosnować, so suwać a kuzłać. Hižo lěta dołho přeprošuje Serbske šulske towarstwo dźěći ze swojich kubłanišćow zhromadnje ze swójbami kóžde lěto na zhromadny swjedźeń do Hórkow.” mdr, serbski rozhłós, 11.06.2018