Fotowa galerija
>> 24.07.2023 | W Serbskich Nowinach:
>> 23.06.2023 | W Serbskich Nowinach:
(Přinošk jako PDF | dalši přinošk wo koncerće w SN, dnja 15.05.2023)
Molowanje jejkow
Jutrowne jejka molować? Nó jasne, to je tradicija w Malešanskej pěstowarni! Tola nic jenož ći mali so w jejkamolowanju wuspytachu. Dobry wothłós namakaše staršiski wječork pod temu “molowanje jejkow pod fachowym nawodom”. Fachowča knjeni Jaworkowa pokazaše najwažniše techniki a mustry. Tak nastachu krasne pisane jejka starši, kotrymž běchu jejka knjeni Jaworkoweje jako pohon. Mjez zabawnymi rozmołwami knježeše koncentrowany a nimale meditatiwny měr.
Molowanje jejkow
“Oh, das sind tolle Muster! Die will ich auch auf meinem jejko haben!”, prajachu dźěći Malešan Witaj-pěstowarnje. Z jehličku a pjerkom skedźbnje horcy wósk na jejko přinjesechu. Wot swětłej do čmołej barby a najwšelakorišich mustrow so tuž jedne jejko po druhim změni a nasta na kónc pisany potpurri krasnych jejkow. Hordźe njesechu dźěći jejka w korbiku domoj.
"Haj Cowboja ja znaju…"
Tak započinaštej so našej póstniskej dnej we Witaj-pěstowarni w Malešecach. Róžowu póndźelu rano zhromadźichu so wštke wulke a małke nory, předrasćeni w krasnych pisanych kostimach a z mócnym „Malešecy helau“ so dźen započina. Při zhromadnych zabawach kaž reja wokoło stólcow, napřemo jěsć z kołbaskami a šokolodźanymi hubkami, klepanje na hornc, rejowanje na nowinach a druhich wěcow so dźeń chětře minješe. A póstnisku wutoru swječachmy dale, dobre pampuchi a zhromadna snědań nam zesłodźachu a póstniske nory po wjesce wótře ćahnychu. Popjelnu srjedu zaćahny zaso měr do pěstowarnje.
Wopyt w Serbskim muzeju
W zymskich prózdnichach pobychu błudnički a hortske dźěći Witaj-pěstowarnje „K wódnemu mužej“ z Malešec w Serbskim muzeju w Budyšinje. Wustajenca molerja Jana Buka nas wabješe. Wšako steji před našej pěstowarnju krasny wulki mozaik molerja. Rebeca nas přez wustajencu wodźeše a nam rozkładźe, kajke družiny wobrazow je Jan Buk molował, kajke barby wón najradšo wužiwaše, kajke motiwy so jemu spodobachu. Z wjacorymi instrumentami my dźěći wobsah wobrazow Buka z hudźbu spytachmy zwuraznić, ćmołe, wjesołe, pisane, mjelčo a wótře. Wobrazy a jich wobsah -kóždemu dźěsću so něšto druhe spodobaše.Rebeca měješe za dźěći papjeru a pisaki přihotowane. Nětko móžachu małe porsćiki z barbjenčkami po wobrazu so hibać, kaž chcedźa. Wobrazy we wustajency běchu dźěcóm přikład, něštóžkuli spytaše motiw Jana Buka na swoje łopjeno kuzłać.
Ptači kwas w krajnej stolicy
Jako srjedź januara telefon w Malešanskej Witaj-pěstowarni “K wódnemu mužej” klinkaše, knježeše po tym pola kubłarkow, kaž tež dźěći a starši wulki hołk a tołk: Sakski ministerski prezident Michael Kretschmer přeprosyše sej skupinu “Błudničkow” na ptačokwasny program do statnej kanclije. Tak wotjědźe 25. januara bus z dwanaće napjatymi dźěćimi, kubłarkami a třiomi maćerjami z Malešec do Drjezdźan.
Po tym, zo bě so posledna kapička stajiła a posledne rubiško wjazało, předstajichu dźěći we wulkej žurli kanclije wućah ptačokwasneho programa. Ministerski prezident kaž tež mnozy sobudźěłacy horjachu so za pyšnu drastu a wustup dźěći. Fotoaparaty a kamery běchu na dźěći wusměrjene, kiž hordźe hudźachu, rejowachu a basnje přednjesechu.
Micheal Kretschmer pokazaše so chětro zahorjeny a jako dźak kiwaše pyšna tafla połnje srokow a chłósćeńkow. Nimo toho dawaše za kóžde dźěćo wulka tita z překłapjenkami. Hosćićel wužiješe składnosć so z dźěćimi wo najlubšim koparskim mustwje abo telewizijnym wusyłanju rozmołwjeć.
Jako připołdnju bus před pěstowarnju w Malešecach zasta, wulězechu horde, zbožowne a tež chětro mučne dźěći z busa.
